وكان إنسـان ====== قصيدة بقلم الأستاذ / عادل عثمان الحجار

 

ياقاضي قول بحق الله ..
أروح وابعد ...
عن الـلِّي قلبي نبضُـه معاه ؟!
ياقاضي اسمعني من فضلك
مانا عايش ومش عايش
ونبضي القاه ..
يَـدوب سطرين ..
على الهامش !
أروح واجي ...
واقول بُـكره ح تتعدل ..
حبيبي بنبضتـي يُـشعر ...
وبالقاه ناسي بالمرَّه
أعيش عيشه ..
لكن مُـرَّه
ياقاضي قوللي من فضلك ...
أنا الظالم ولاْ المظلوم ؟
حبيبي رماني ف بحوره
وهو عارفني مااعرفشي ..
فنون العوم !
أنا الظالم ولاْ المظلوم ...
وهوَ بنبضُه متأكد ..
بشوقي إليه ...
وإنـُّه كمان ضيا عيني
ولاباصعب ولو لحظه ..
بجد عليه !
*****
نطق قاضي الغرام قاللي :
ح نسمع من ضيا عينك ...
فقلت تمام
*****
ضيا عيني ...
بينطق حكمُه بالإعدام ...
يقول لأه ...
أنا مظلوم وانا الجاني ..
وانا اللي كل أغصاني تطُلَّ عليه / وماتقولليش .....
فباستغرب
- حبيبتي غاويه ليه تهرب ؟! -
كمان بتقول :
ياقاضي احكم بتفريقنا ..
عشان نبضي بيتألم ...
فِ قُـرْبـُه ف لحظه بيسلم ..
ولو يبعد ..
باحنِّ إليه .....
*****
نطق قاضي الغرام حُكمه - وكان إنسان - :
تتم مصالحه فوريـَّه ..
مابين النسمه والأغصان ...
وحُـكم كمان بألف جنيه ..
على الجاني اللي عايش م الحبيب هربان
وحُكم كمان على المحبوب ..
لابد يعلـِّم العاشق فنون العوم ..
ياخد بإديه
فمديت إيدي ف جيوبي ..
عشان ادفع بداله الألف ...
صحيت م النوم ...
لقيت عيني الشمال بتـرِّف .

===========
عادل عثمان الحجـار