من توبى ..
لأ ، مش من توبى
دانا عايش على قدى يادوبى
وحبيبتى .. فى البرج العالى
فيا قلبى مهما هاتحلالى
مش ممكن من برجها تنزل
انسج فى غناوى الشوق واغزل
هيّا ك هيّا ك
دقك على قدّه فماتدّقش
أبعد من حدّك ومداك
خلينى أعيش اللى فاضل لى
مرتاح البال
ازاى رح اطاوعك وعمايلك دى
لعب عيال
وانا كل الناس تشهد انّى
واد عال العال
ماعشقتش غير سبحة ايدى
ولاخدتش غير الله سيدى
وباصلّى على محمد دايما
وادّيها عياط
على ماضى اتضيع من عمرى
كات ريحته شياط
أنا تبت خلاص من أفعالك
ريّحنى عشان يرتاح بالك
وطاوعنى الله يصلح حالك
واسمع لكلامى ولو مرّه
ماياتسمع .. ياهاتطلع برّه
فاضل على صبرى يادوب جرّه
مابقيتش باطيق
مش عايز اصادق غير ورعك
ولا عايز غيرك ليّا صديق
تملانى ايمان واملاك تقوى
والدنيا نبدّلها بدين
تقرا الاخلاص وانا مشدود لك
واقرا لك بعدها سورة التين
وان متنا نموت عننا راضيين
طالبين الرضا من رب الدنيا
ورب الدين
طامعين فى ميراثنا من الجنّه
فدادين فدادين
سيبك م الدنيا اللى ماتسواش
سيبك م الناس
ولاتسمع يوم غير صوت عقلك
ولاتعشق حد بيضحك لك
دى الضحكه وراها ياقلبى هموم
وسطور تتسطر لذنوبى
وانت اللى ف دنيتى محبوبى
ماتقوللى آمين
ماتقوللى آمين
ماتقوللى
آ
م
ى
ن
................
علي جامع