أصلها ..قسمتي ونصيبي...قصيدة بقلم الشاعر / أحمد حسن عمر

 

بتتنرفز وتتعصب

وتكسر كل شىء غالى

وأنا بأصبر وبأتحمل

وأقول كله عشان خالى

تزيد فيها وتتمنظر

وتتبغدد على العيشة  
وتبقى المشكلة أصغر

فتعمل ليها تحبيشة

وتبكى كإن أنا ظالم

وهى يا خلق مظلومة
 
بتطبخ فى السنة مرة

وطول الشهر «كنتاكى»

ودايماً العشا بره

وأدفع وأبقى أنا باكى

ولما أرفض تأنبنى

وتصرخ عايشة محرومة

بترمي الحاجه ماتلمش

ولا بتنظم الأوضه

وانصحها ماتهتمش

لكن تهتم بالموضه

ولما أشكى تكذبنى

وتبكى بدمعة مرسومة

بأصرخ من عمايلها

وأقول يارب أهديها

ولما أمها تجيلها

ألاقى النار تقيد فيها

وأسمع عزف م الأصلى

وكام أغنية منظومه!
 
مش طالب يا ناس حاجة

غير حقى اللى ضاع منها

ومش عايز كمان حاجة

ولا ضيقتى ح بينها

وأعمل إيه وده حظى

ودى القسمة اللى مقسومة!

..........................

أحمد حسن عمر