- اوعى تقول انك بتحب - قصيدة بقلم الأستاذ / أيمن حسن عباده

اوعى تقول انك بتحب
وانك تملك روح وقلب
كل كلامك زيف وخداع
كل مشاعرك كدب فى كدب
اوعى تقول انك بتحب

اوعى تقول انك حبتنى
وانك عمرك يوم ما نسيتنى
لو حبتنى ليه بتفوتنى
وتسيب قلبى من غير ذنب
اوعى تقول انك بتحب

اوعى تقول انك ضحّيت
علشان قلبى وياما قاسيت
واتعذبت عشان حبيت
واتحملت عشانى الصعب
اوعى تقول انك بتحب

لو حبتنى وحبك صادق
لو إحساسك إحساس عاشق
كنت ما تهجرنيش وتفارق
قلبى اللى بيحلم بالقرب
اوعى تقول انك بتحب

داللى يحب يعيش ويصون
عمره ما يخدع ولّا يخون
عمره ما يظلم مهما يكون
عمره ما يجرح أبداً قلب
اوعى تقول انك بتحب

داللى يحب يعيش لحبيبه
يبقى دواه ويبقى طبيبه
لو أوجاع الدنيا تصيبه
يبقى هوّ الدوا والطب
اوعى تقول انك بتحب

أنا حبيتك من جوايا
واتمنيتك تبقى معايا
كنت بشوفك أجمل آيه
كنت بحسّك أم وأب
اوعى تقول انك بتحب

ليه بتحاول تخدع قلبى
ليه تظلمنى ليه فى حبى
أنا حبيتك كان ايه ذنبى
هوّ الحب جريمة وذنب
اوعى تقول انك بتحب

يللى الحب فى قلبك مات
بطّل تحكيلى فى حكايات
وتعيّش قلبى فى روايات
صعب أصدق قلبك صعب
اوعى تقول انك بتحب
وانك تملك روح وقلب
كل كلامك زيف وخداع
كل مشاعرك كدب فى كدب
................

أيمن حسن عبادة