" قلبي الخواف " قصيدة بقلم الأستاذ / محمد البنا

ولأنك أكبر
من أي كلام يخطر على بال
ولأنك أجمل
من أي جمال ممكن ينشاف
قلبي الخوّاف
بيحبك بس
وبيعشق بس
ويخاف لو مس
ف اللمسة يدوب
ده الهمسة لنن عيونه يادوب
بتفجر فيه أنهار أشواق
وتصحّي قلوب كل العشاق
فينام على آه
وينام مشتاق
قلبي الخواف لسّاه بيخاف
لو ضمّك حلم ما بين دراعيه
م الفرحة يموت
فاختار بإيديه
السكة الصعبة لرمش عنيه
ف عيونك نام
على أمل إن ف أحلامك / جايز هتضمّيه
فيموت مرتاح .

...............

محمد البنا