"هأقول لك إيه ؟ " قصيدة بقلم الأستاذ / محمد البنا

هأقول لك إيه ؟
غير إنهُ مفيش / زعل منك
غير إني باعيش
ف خير وسلام
برغم إني باموت عطشان
لفيض الهمسة ف النني
ورغم إني
أنا المسكين
بقالي سنين على بابك
ودق القلب فاض مني
لكن عينك / ما بتمسّيش
ولاّ حاسة
بإني حزين
وإني حبيب قتلني الشوق
لنظرة عين
هأقول لك إيه ؟
غير إني باعيش
ربيع ف ربيع
مادام الصيف
ف ريع قلبك
عليه عدّى وما اشتاقتيش
ولاّ شُفتيش
دموعي خريف
فهلّ الشتا بدري
على البردان
على المحتاج للمسة حنان
على الغرقان
ف رعشة رمش / من ننك
هأقول لك إيه ؟
غير إني باعيش !!.

.....................

محمد البنا