وخد عندك ...قصيدة بقلم الاستاذ / أحمد السندباد

 

وخد عندك
مع انه مايعرفكيش
ولا عمره سمع عنك
لقيت البحر يسألنى
وفين هى ؟
قدرت ازاى تفارقها ؟
فقلت انا مين ؟
فقال لى بلاش تلاوعينى
كتير زيك هنا عاشقين ملازمنى
اقولك سر م الاخر
انا من ايه ؟
وايه سرى وتكوينى ؟
فى ساعة الجذر اكون دمعة
ساعات برضه اكون المد
واكون اغنية للعشاق
كتير اخبار
كتير اسرار
وخد عندك
ده واحد جاى م العمرة بقى له يومين
كتير احباب بيتلاقوا
فى لحظة شوق بتعاهدوا
لاخر العمر ما يفارقوش لبعضيهم
وناس حلوة بتتواعد
وناس بتفارق الدنيا
وناس تقتل ف بعضيها
عشان قرشين
دموعكم جوه فى عنيا بتوجعنى
ولما تلاغى محبوبتك
مافيش مرة تجيب سيرتى
مابتقوليش ولا حاجة على موجى
على خيرى اللى متوزع على الدنيا
تقول يا حبيبتى
لون الليل ده لون شعرك
وشمس الدنيا فى جبينك
عيونك زى نور البدر
واهدابهم دى مرسومة
بكحل وجاى من بابل
واما الغصن غصن لبان
وانا حلقى خلاص مرر
ياريت تبعت لمحبوبتك عشان تيجى
وتركب جنبها قارب
واهدهدها على موجى
تمد ايديك على جبينها
تنام دوغرى
تمد شفايفك الخمرى
عشان تصحى
وتشرب شهد متصفى
عبير روحك بيأسرها
ايديك ع الخصر بتضمه
تلاقى الفرح يملى الكون
ومتخافشى وتتلفت
ولا واحد هنا شايفك
وسرك راح يكون فى البير ومتخفى
ولسة برضه بتدور على عيونها
ده انا زهقان خلاص منك
لو انت خلاص مفارقها
راح ابعت موجى يندها
تونسنى فى عز الليل

........................

أحمد السندباد