( الدنيا ) ................... قصيدة بقلم الشاعر / ناصر علي توفيق

أنا قلت اتمطع واتمرد
وافرد جناحاتى المكسورة
====
واهزمها الدنيا المغرورة
زى الكورة
====
تضربها برجلك تلاقيها
ترشق في الجون
====
مجنون اللي يجيلها تسلل
مهما يحَّول دفتها
====
هترجع م الأوَّل
برة الصندوق
وساعتها يفوق
====
على صفارة حكم الملعب
هيصَفَّر تووووت
====
يمكن تتطوَّر في ساعتها
ويديها كروت
====
الدنيا دى لعيبة لاعبها
أوعى تعيبها
====
يمكن تتحاور تغلبها
أوعى تسيبها
====
الدنيا دى لما تكشرلك
اديها بالبوت
====
ولا ترمى المنديل وتسلم
الا اما يجيلك ملك الموت
====
وإن ضحكت أوعى تصدقها
افردلها صفحت ايامك
لم ورقها
====
ولا تكتب يوم انك قادر
القادر هوَّ اللي خلقها
====
راح تاخد إيه مهما تسافر
أوعاك تتغطى بخلقها
تصبح عريان
====
متهان اللى يحادى عليها
خسران اللى يتاجر بيها
ندمان اللى اتعلق فيها
====
وان دُرت معاها الدوَّارة
تصبح شيطان
====
غلطلن اللي اتدلل فيها
مليون غلطان
====
قوم لملم ايامك والحق
فتافيت العمر إل بقيالك
قوم سد القرض
====
وأدان الحق اما ينادى
قوم أدى الفرض
====
اركع للمولى اتزل له
واسجد في الأرض
====
راجع ايامك وسنينك
بالطول والعرض
====
وسنين العمر اما بترسم
تجاعيد تجاعيد
====
واكيد العيد لما هياجى
مش زى العيد
====
والايد اللى فايتها امبارح
مش هيَّة الايد
====
والعين اللى بترقب بيها
راح تلاقيها
مليانة ضباب
====
قوم سُك الباب
واتسنَّدعلى أيام فاتت
ويَّا الأصحاب
====
أصحابك عملك قرانك
دول هما القوت
====
والدنيا دى لما تكشرلك
اديها بالبوت
====
ولا ترمى المنديل وتسلم
الا اما يجيلك ملك الموت
====
ناصر على توفيق