احلام خضار ...... قصيدة بقلم الاستاذ / سعيد شكري

أحلام خضار ...
لكنهم ... أحلام كتار...
مع أنهم ... احلام فروخ
فوق عمر تكعيبة زمن
مليان شروخ ...
مع انهم ......
طارحين عناقيد الامل
فى قلب لما ... كان رمان
كان بيحلم ...كان يدوخ ..!!!
وبتخطفيه بعنيكى لما بتلمحه
مع انه قبلك
الف عين حامت عليه ...تستسمحه
ولانه كان مستنى قلب يفرحه
اختار اوام
اختار مابين الحب ...او موتة بسلام !!!
اختارك انتى وقال على الدنيا السلام!!!
احلام كتار....
وبدرهم المرصود لبابك ديدبان
فوق عشب من نيلك طرح
راحة وامان...!!!
فاكر ساعتها
كنت رامى الكتف بالحمل التقيل
مع ان قلبى مش عويل
مع انى طول العمر لحمولك بشيل
مع انى طول العمر
لاكليت ولامليت ولا بصيت
لغير شمسك نهار
مع انى لا حبيت ولا اتمنيت
إلا هذا الحضن دار !!!
احلام خضار
وبدرهم المرصود لبابك
خلف هذا الإنتظار
ومهموش إن العنيدة افروديت
ترميه ف بحر مالوش قرار
حباية محبوسة ف صدف
ومهموش إن الصدف
جايز تغير كنيته ...
وتحوله
من ديدبان لحصان خشب
او سطر محبوس ع الورق
ترميه ف حضن كتاب تاريخ
مركون ...وجايز يتحرق ..!!!
او حتى يمحيه الغبار !!!!
احلام خضار ...
لكنهم احلام صغار
مش زى احلام الكبار
بحلم اعيش والحلق خالى م المرار !!
............................
سعيد شكري