( حلم عادي ) قصيدة بقلم الأستاذ / أحمد رجب معيط

 

بلادي بلادي بلادي
كل حاجة فيكي عادي
عمناول زي السنة دي
وامبارح زي الساعة دي
الآعادي هما الصحاب
والصحاب هما الآعادي
اللي عاش زي اللي مات
واللي مات راح بلاش
واللا بلاش نجيب السيرة دي
علمونا فى المدارس
كل شئ يجوز وجايز
و اللي واقف زي اللي جالس
و اللي حاضر زي اللي غاب
وان السؤال فى الامتحان
مش محتاج علام محتاج جواب
وان الإجابة ما بين قوسين
.......حادي ........ بادي
واللي عدي زي اللي عاد
................كله عادي
فهمونا فى المشافي كله شافي
وان علاج المغص مفيد للصداع
وان ودهان البرص ينفع للقراع
وان اللي مات فى الطابور
زي اللي مات فى السرير
لإن فى بلادي العجيبة اللي
من طبعها بوس الآيادي
الأول زي الأخير
.............كله عادي
وان اللي مات فى الشوارع
والجوامع والجامعات
قضا ربنا ، عمره أنتهي
ولو ماكانش مات بالرصاص
أو تحت عجل الدبابات
كان برده مات وفى ذات الساعه دي
يبقي طبيعي موته عادي
وان اللي جوه السجون زي اللي بره
لإن اللي بره هيبقوا جوه
واللي جوه هيبقوا بره
ومرة فى مرة
اللي جوه واللي بره
هيبقوا عادي
نفسي يا بلادي الكريمة
ياللي كل حاجة فيكي عادي
إني أحيا فيكي عادي
إني أحلم فيكي عادي
إني أحس فى يوم بإني
لي قيمة مش شخص عادي
حتي حلمي .. حلم عادي
  ابن معيط