الهارب... بقلم / حمدي موسى

فى عالم سرى خلف الكون
فى رحم الروح بنتقابل
فى بيت مبنى من السوسن
من النرجس من الكادى
جيران شبهى....امان شبهك
وكون راضى
وشرفة تطل على غابة
لكن كل اللى فيها أليف
لا فيها وحوش ولا حوالينا 

ناس قاسية وكدابة
ولا بيفوت عليها خريف
يكسر قلب لبلابة
وبتكونى ساعات ماما
وأحيانا بكون بابا
بيروى العشق نظرة عين
بيطرح بسمة خلابة
وبتوضى على خدودك
ولما بتيجى تتشاهدى
بكون فى إيديكى سبابة
ومرة انام على حجرك
ومرة تنامى على حجرى
فى دنيا من زمن مخصوص
لا فيها ميلادى ولا هجرى
واحبك والمسك بشويش
واشبك ايدى ف ايديكى مشاعرى تعيش
وحوالينا الزمان يجرى
ياعمرى المخفى جوايا
يا روح مخلوقة من أمرى
قيامى ف حضنك التراويح
اصلى العشق ميت ركعة
وشوفى الحب كام آية
انا هارب من الأيام وبتدارى فى أنوارك
مطارد من جميع الناس
مفيش قدامى غير دارك
انا جاى من زمن تانى
لكن عاوز زمن تالت
انا كنت ف زمانى ملكل كن هجموا على ملكى
وجيشى انهار.............ومملكة الهوى زالت
انا أصلا أسير هارب من الكهنة وم الفجار
عشان عاوزين صنم كافر بدين العشق والأشعار
انا لاجئ لدولة حبك الحرة
احمينى وضمينى وخلينى أموت فيكى
نفسى أموت على صدرك
واسيب الحب ف ايديكى
ميراثى لجملة العشاق
ورحمة ونور على قلبى اللى مات مشتاق
يشوف الحب ف عنيكى

........................

حمدي موسى