بين قاتل آو مقتول
عدي وراسك معدول
اشهد بالحق وقوله
اغزل من صوتك نوله
واستني ولو لفصول
الشمس هتطلع تاني
والليل هيكون ف أغاني
بس انت اصبر هتنول
مش صبر انك تتداري
او تهمس جوه محاره
تسأل.. دا إنت المسئول
عن حلم بتتمناه
ونهار وبتستناه
مش جاي..غير بعد طبول
للحرب اضربها..اضربها
اعلنها وكون ف شبابها
سيف الحق المسلول
كسر زنازين الخوف
وافتح ف عيونك شوف
الحق لازمله القوه
وايمان من قلبك جوه
انك ملايين ف صفوف
استغفر من حرمانك
من باطل جه ف مكانك
خلاك ف الليل بتطوف
مش لاقي جمال أغانيك
ولا لاقي اللي يغنيك
لو شافك شئ مكفوف
.........