ألبوم صور .... بقلم الشاعر / ابو عمار المصري

كل الصور هتروح لها
وعليها بوسة
وإمضا بدموع الفراق
توصف لها وجع السنين
والتوهة فى بحر الجراح
وتذكـَّر الشط اللى راسى
فى بحر عينـِك
باللى راح
وتقول يا بـُكرة
شمسى مش ناوية الشروق
ولا نجمتى تانى هتلمع
فوق خدودك
ولا كحلة العين
مهما تدمع م النواح
راح تمحى خطـِّك
من خطوط راسمة الحدود
أو كل لحظات الآهات
راح تمحى إسمك م الوجود
ما انت الوجود
وانت الحقيقة زى موتى
والميلاد
يا رعشة القلب الحزين
بتبان فى صوتى
ريحة الشياط والدخنة
خارجة فى النفس
حسى اتحبس
للدمع صوت
للهم صوت
كرباج على ضهرى بيصرخ
ألف موت
مليون تابوت
عاملين جنازة جوة حلمى
ما وقفوش الحلم بيكى
صوت الآدان يبكى مع رنة جرس
وطريق ياخدنى من ميلادى للممات
مليون حرس
يا فرحتى ..
حرس الحرس
حارسين جنازة ..ليَّ انا
وانا بس عارف إنى انا
وانا بس شايف جـِتـّتــى
متقطـَّعــة متغـَربـِلة متشـَرّحة
ودى أحلى صورة ليكى عندى
يا مؤمنة
صورتى أنا
دمى مغـَطـّى كل طوبة
فوق جدار المشرحة
يلا افردى كل الـصـّـور
وافتكرى يوم واتـفـَرّجـى
أنا كنت بازحـَف بطنى خالية
لما كنتى بتـعــرُجى
فضـّيت نـُخاع عـَضمى هنا
لجلن عليه تتعكـِّزى
أنا بس نفسى ف صورة تانية
بس ثانية
فيها أشوفك واقفة
راسك عالية فوق
فاردة شعورك ألف سكة للأمل
صورة لعينى
يوم ما شافـِت قـَلـعـَهـــا
تشوفى بيها
صورة لإيدى بالسلاح
فى وشوش أعاديكى
صورة لقلبى بيتحرق
وبآخر النبض اللى باقى
يقول سلام
مليون سلام

..............
بــــقـــلـــــــم ا لــــشــــــــــا عــــــــر
أ بــــــو عـــــمـــــــا ر ا لـــمــــصــــــــــر ى