آسف على الكلمة الغلط
آسف حبيبتى باعتذر
انا مش باحبك
يعنى ايه الكلمة دى
ولا فيها شئ م اللى اعرفه
علشان شعورى ناحيتك
من غير لغة..من غير صفه
انا حاس انك حاجه فيا
شئ بدال قلبى الضعيف اللى اختفى
اول ماحس بطلتك
أول ما قرب ناحيتك
حبة حاجات مترتبه على بعضها
ساعة صفا
حضن ودفا
هجر ووفا
متناقضات لكنها متولفه
وكأننا واحد صحيح
فى معادلة عاوزه معطيات
وكاننا آخر رقم
وكأننا كلمة جديدة فى القاموس
احنا حبيبتى حاجة خارجه ع الناموس
يعنى الهوى فينا بدون الأكسجين
احنا سوا فى الحب آخر جين
وعلامة سكون
بتشكل الحرف الجديد وتحركة
انا يا حبيبتى
حاجة بعد العاشقين
يعنى باحبك مرتين
انا يا حبيبتى بعشقك
واتمنى كل الدنيا تدعى لحبنا
وتقول آمين
سامحينى على كلمة باحبك
اصلى مش لاقى البديل
لكن هاحاول احلها واعمل لها
حرفين تلاته اربعة
يمكن تعبر عن شعورى
الصادق الحق الأمين
..................................
حمدي موسى