ايه اللى غاصبنى ياعم الحاج
اعيش مع واحدة عقلها هج
واحساسها كله بتخطيط
تاكل تشرب تصحى تنام
كله لفين ومنين وبكام
وانا قلبى ماكان عمره حويط
امبارح بتقشر كوسه
قلت لها ياحلوة ياننوسه
البيت فاضى وعايز بوسه
تهب ف وشى كما الوطاويط
بوسة ايه يابو بوسة اتنيّل
اصبر لما الدنيا تليّل
حملك مش سهل ولا قليّل
اهمد بقى وبلاش تنطيط
اللى يشوفك رايح جى
وكأنك ابو تريكة ياخى
يقول هتكسّر كل الحى
وهتحضّر كل المساخيط
ما تخلى الطابق مستور
مرة عشان كتفك مكسور
ومرة عشان ضغط الجمهور
ويضيع الدورى ف تظبيط
فخلينى مكتومه وساكتة
لسه هصبّع باقى الكفتة
وامك طالعه ياحلو وبايتة
وانت عارفها ف التنبيط
خفّى عليه جبتى له الكافية
ياعين امه بيطلع بالعافية
وكلام م الموزون ع القافية
وهاتك بقى سكع وتخبيط
واللى يشوفها ام الستين
ام سنان نصها واقعين
واخده من بنتك قمصين
ام حواجب زى الخيط
وانا مش بوستك من شهرين
بعد العمرة يادوب بيومين
بأمارة وكان يوم اتنين
انت ده انت يالهوى غويط
قلت لها ياولية القلب
مهما يشوف ويشوف م الغلب
عمرة ف مرة ماينسى الحب
مهما حياته كانت لخبيط
مش عايز من وشك نيله
وربنا ياخد خالتى جليله
شاطرة وغلبانه ومن عيله
وهتبقى ف طوعك ياعبيط
اهي دى الغلبانه اللى اكيد
هتخلينى بطوعها سعيد
ماسكة لى دفتر مواعيد
حتى البوسة بالتفريط
حُبك بقى فالصوا بقى سورى
واقف زى اللقمه ف زورى
شارطة علىّ احبك فورى
وحُبك لىّ يكون تقسيط
ايه اللى غاصبنى ياعم الحاج
===========
محمود عوده
روعه
ردحذفروعه
ردحذف