وف المطر ..وقت الخطر
القاكِ هايمة بترقصي
كأنك " سالومي" ف رقصتك
فوق دمعتي بتتنفسي
وبتطلقي صرخة مرح
وسط الاهات متنغّمة
وعينيكِ تضوي م السعادة
بتزيدي اه ما بتنقصي
إيدك ماليها الخوف
وبترجفي ساعة الوداع
صعبان عليكي تعطفي
او تكتفي بسطرين خداع
فاردة وسط الكون جناح
ويّا ريح الغش طايرة
جوة صمتك الف صوت
يفرحوا لو قلبي ضاع
فوق شفايف الغدر حتمًا
ترسمي لك ضحكتين
تخدعي بيهم ضحية
كان مأمن من سنين
ان حبك عنده غاية
صعب يوصل له ف يوم
وامّا تاخدي منه غايتك
ينزل التتر الحزين
عشت عمري ليكي عاشق
عشتي عمرك ليّا تعصي
كنت راهن قلبي عندك
قلت يوم جايز تحسي
ان حبي مش خضوع
يجري ليكٍ باستكانه
حبي ليكي من صفاته
نوره يشبه ضي شمسي
الف قصة بتكتبيها
تمثليها وتخريجيها
البداية هي هي
والنهاية برضو هي
انتٍ لازم تقفليها
تبقي ظالمة ف الحقيقة
وف الرواية انتٍ الضحية
والسيناريو والحوار
صرخة ممكن تحبكيها
ابكيتاني لحد غيري
واطلقي كل الدموع
وافردي شراع الندامة
وارمي ع المرسى القلوع
صعب اصدق دمع عينك
لو ركع يطلب رضايا
اصل حبك عندي مات
واتقفل باب الرجوع