في المنام .... بقلم الشاعر / عبد الله الغلبان

 

شُفْت والدِىِ ف المَنام

قال لى شايل هَمّ ليه ؟؟

قُلْت لُه الأيَّام علينا

صَعْبَه جِدَّاً ... قال لى فيه

حَدّ يقْدَر يوم يغَيَّر
حَرْف مِ المَكتوب علِيِه ؟؟
قُلْت لُه المَكتوب دا غيب
واحنا مُش عارفين بُوُ إيه
واحْنا ف الدُنيادى لازِم
نِبْذِل الجُهْد الكِبير
لجْل نِقْدَر عَ المَعيشَه
الكُلّ يابا بيسْتَجير
كُلّ مِن عايش يا والدِىِ
بينْطَحَن زَىّ الشِعِير
من غَفير غَلْبان ف عِزْبَه
لِ حَدّ ما تحَصَّل وَزير
كُلِّنا ف الهَمّ عايم
والشُطُوط بِعِدِت كتير
والنَفَس قَرَّب يضِيق
من وَحَاشِة دا المَسِيِر
جِينا للدُنيادى ليه ؟؟
لجْل مَ نعاشِر حِمير ؟؟
هَمُّهُم سُلْطَه ف إيديهُم
حتَّى لو كات بالحَرام
لأ .. وكُلُّه اليوم يا والدِىِ
بينْتِحِل صِفَة الإمام
والخَوارِج عادوا تانِىِ
بيحْيوا شَرْع الانْتِقام
شَرْع ما وَرَدِت نُصوصُه
ف سِفْر أو قرآن كريم
والأكادَه قال يقولوا
انّ اللى بيْسَوُّوه دا دِين
جِبْت لُه ووَرِّيتُه فِيديو
وفيه شَبابنا المَذْبوحين
قُلْت لُه شوف اللِّى عايش
فِ اللى عايش سَوَّى إيه ؟؟
قال لى مَلْعونَه الحَيا دِىِ
دِىِ القُبور اهْوَن كِتير
قُلْت لُه ادْعيلَك يا والدِىِ
قام ضِحِك والسِنّ بان
وب لِسان الأبّ قال لى
الدَعْوَه دِىِ للمَيِّتِين
واحْنا جَنْب اللى انتوا فيه
للدُعاء مُش مِحْتاجِيِن
دا انتوا يا ابنِىِ الله يعِينكُم
عَ البَلاء اللِّى انتوا فِيِه

.............

 عبد الله الغلبان