ياشاعر قوللى بالذمة
بدون ماتوارب الكلمة
خريف العمر بيعدى
وانا بودى
اشوف الكلمة رياحه
ف بق الناس
باحساس اللى فيه احساس
وبتفتح ف سكتنا
طريق وناس
تقول القول
ومتأكد يكون الحق
مااشوفش الكلمة
دبلانة ف سقف الحلق
وسرب الغدر بيحوم على راسى
ونازل دق
واشوف الشاعر الواعى
مابيقول لأ
ف وسط الهوجه
أطوع مع التيار
وأتلوى كما الملدوغ
ف وسط النار
وأحلف مركبى واسعه
وفيها الخير
وفوقها الكل بيعافر
على التغيير
وكيف أقبل
أكون الواعى والمكتوم
وعين الشمس بتشاور
على الظالم وع المظلوم
يمين الله ماانا خايف
ولا خواف
لكنى بالنظر شواف
جيوش الضلمه
بتقرقض جدار النور
يدور الهمس ياشاعر
عليك الدور
أشوف شاعر
على الشرفا بيتأمر
ولو شاعر
يهد السيرك والسامر
وينقش فوق كراريسه
حروف للمد
ويومها راح نقول شاعر
وسيفه حد
............
طارق زيادة