جوايا حاجه معطلانى عن الكلام
وقف الكلام عطل القلم والفكر حاير
قد يجوز ان اللى عطلنى السجاير
اصلى بطلت السجاير
أو يجوز فيه مشكلة جوايا فى شكل المشاعر
اصلى شاعر................. واحتمال
انى بندم ع الكلام اللى انكتب
من بلوغ سن القلم
إلى شعور الكلمة بمشاعر خصوصى
لما بدأت تبقى كلمة ونفسها تلبس قصيدة كعب عالى
أو نفسها تلون خدودها ونفسها تفك الضفاير
فيا حاجه مغيرانى فيا واحد شكل تانى
جوه منى فبه مكاسب فى الشعور
بس برده فيه خساير
جوه منى قصة بس مجننانى
احتمالات الحياة فيها سراب
واحنمال الموت امانى
هحكيهالكوا
مانتوا اهلى وناسى واصحابى وجيرانى
كان يا ما كان .....كان زمان
ايام ما كان الحب يتعلق قصايد
ايام ماكانت أرضنا ملهاش حدود
ايام ما كان الحب يرجع بالفوايد
كنا شعرا وكنا أمرا وكنا سادة
كان شعر نائلة دونه الموت والشهادة
حبيت أميرة ................عشقتها
واما يبقى الشعر دين
يبقى فيه الجهر بألأشواق عباده
معرفشى بكتب شعر ولا انا بدلى بشهادة
والله لقول الحق ...........عشقت ولادة
يادى الأميرة اللى عشان الشعر حبست قلبها
عاشت آلام الحمل من غير الولادة
دفعت ضريبة الحب من جيب السعادة
لله درك يابن زيدون الذى عشق الأميرة وانتهى بالجارية
يا هلترى كاد الهوى أم أخطأ الضرب .......فكاد فؤادة
بحبها ..........يمين تلاته بحبها
والقلب مش قادر يدق اكمن فيه زيادة
. وفرضتها ضمن المشاعر فرض عين
يعنى اللى ينسى اسمها يبقى عليه كفارة
أو يقرا لشاعر
ولادة يا أجمل امل لسه ملامحه ملخبطة
ولادة يا كلمة فرح لكن عليها شخبطة
ولادة يا آخر محاولة للحياة
ولادة يا آخر قصيدة فى الغزل
ولادة يا حلم اتغزل من شوق حرير
يا آخرة الصبر العقيم
اللى بقدرة ربنا صابه الحبل
ياحلم بالحلم اللى ممكن نحلمه مع بعضنا
يافرحة العمر اللى راجع من زمان
جاب انتصار الحب راجع بالبشاير
الحب ده مخلوق عجيب
عمره ما جمع عاشقين
لكنه عمره مارد زاير
يارب يا خالق قلوبنا والمصاير
ابعتلى ولادة ودنيا من جديد
اصل عمرى اللى انقضى ظالم وجاير
.................
حمدي موسى