متلخبط ايوة بخبط
في الجغرافيا وفى الكلمات
***
ولاقيتني بتوه في الدنيا
واراجع تانى الاتجهات
***
الغرب دخل في الشرق
وتاه الشرق ومش بالاقيه
***
والشرق اتلون غرب
وجاى الغرب عشان يمحيه
***
وفتحت الدش بدور يمكن
الاقى الشرق يا خال
***
وقلبت عدلت طلعت نزلت
وشفت اللي ما يتقال
***
دى محطة وفيها اغانى
ومش عجبانى الأغنيات
***
فساتين مقصوصة بنات مرصوصة
فين الأخلاق يا بنات
***
والتانية كمان والتالتة
لحد المية وقلت خلاص
***
ولاقيت الشرق بريحة الغرب
في قدمه لحد الراس
***
وقفلت الدش دخلت العش
ونمت ومش نعسان
***
فكرت وقلت ارجع وادخل
للخارطة وللازمان
***
دى خريطة فاكرها عبيطة
بس العيب مش فى المكتوب
***
وماسكها واقلب فيها
بلاقى كل عدل مقلوب
***
الطول بقى عَرض وعِرض الارض
اتزل كمان واتهان
***
تخاريف وخريف ولا شتا ولا صيف
مش عارف اى زمان
***
متصدع قوى متوجع
بس بدال مهروح ببلاش
***
قررت انى أكون جاهل
ولا اقولك أنا هتاش
--------
ناصر علي توفيق