حبيبتي والعملة ....بقلم الشاعر المبدع / علي جامع

حبيبتى مش حلوه
ولا وشها مدّور ولامنّور
لكنّما
زى ماهى العُمله ف ايامنا
بتزّور
شافت حبيبتى روحها جوّايا
شالت ف ايد زيت شعر
والتانيه فلايه
ضفرت مواويل الغنا فيّا
وجّت فى قلبى اللى انطرب
ريحة العسل والزيت
وجّت وانا وجّيت
خرّمت فى بورها وبساتينها
اللى مااعرفهاش
قالت أكيد الخطوه سيقت لك
اتهز حجر القبول
سكّت ليه : ماتقول
رديت
سكاتى رضا
رديت
وانا اول العارفين
بالكدبه على نفسى
وانا سيد الجاهلين
بأنها كدبه
وبأنها
ولا وشها مدّور ولامنور
لكنّما
زى ماهى العمله فى ايامنا
بتزّور .
...........................
علي جامع