يا ام الورود ع الخد
يا ام الشفايف شهد
حلوه العيون السود
والوصف فاق الحد
شعرك سلاسل دهب
عشقك عليا انكتب
يحلى الغزل فيكي
والشعر والكلمات
باسهر لياليكي
أنا والنجوم بنبات
نفضل واخدنا الشوق
ولا سهرة تحلى لنا
ولا عمر بالنا يروق
ولا يتصلح حالنا
واقفين على بابك
بالشوق بنستنى
يطلع علينا القمر
نطلب ونتمنى
لو حتى نظرة رضا
يا حلوة من عينيك
والمرسي والسيدة
بعشق فساتينك
عارفك ومتأكدة
كترة محبينك
وانا ف طابور الغرام
واقف ومستني
تفتح بيبان الأمل
والاقينى متهني
أكتب قصايد شعر
م الفرحة وبغنى
أزرع من الكلمة
لحبيبتى مليون غد
يلمس جدار السحاب
ولا عمره يوم يتهد
أرجع ومن تانى
أوصف حبيبتي واقول
يا ام الورود ع الخد
يا ام الشفايف شهد
حلوة العيون السود
والوصف فاق... الحد
لسة الكلام ما خلصش
روح قلبي ... وأما بعد .
--------------------
محمود السيد .
محمود السيد .