تساع الكل أحضانك
وليه حضنك مابيساعنيش
تشيلي الغرب في عيونك
وليه عينك..مابتشوفنيش
غزلت القلب في شراعك
لكن بحرك..ما وصلنيش
بتنزل دمعة في وداعك
تبوس عـ الخطوة ما تعديش
بكيت بدموعي في غيابك
أنادي عليكي..ما ترديش
رجعت بشوقي لرحابك
لكن قلبك.. ما صدقنيش
قفلتي في وشي أبوابك
بكل القسوة ما رحمتيش
وراجعة تقولي إيه صابك
وليه يا بني ما بتزورنيش
تلومي عليا...ما تلومي
تزيدي عذابي وهمومي
أنا اللي عشقت من يومي
مواني الغربة والترحال
عشان مالقتش يوم منك
حنان الأم
شربت الذل من كاسك
بطعم الدم
وشاب الحلم في عيوني
وشلت الهم
ميزانك..كفة مقلوبة
وعدلك مال
ودايماً عايشة مغصوبة
وحالك حال
عينيكي السودا معصوبة
وصبرك طال
سنين العمر محسوبة
يا طول البال
ماعدش باقيلنا فـ الآخر
كلام يتقال
فايتلك شعري ومشاعري
وروح مسكونة بهـواكي
وشايل حرقتي وقهري
وقلبي الصابر الباكي
ورااجع.. تاني للغربة
وليل الوحدة في غيابك
تهون السكة لو صعبة
يا كارهة وبايعة أحبابك
يا كاشفة ضهورنا للجلاد
وواقفة مغمضة عيونك
وحرمانا الأمان والزاد
وخيرك..للي بيخونك
يا مفتونة.. بفرعونِك
وغاوية المدح والتهليل
وعايشة مصدقة ظنونِك
وقسمانا قابيل وهابيل
فايتلك.. نيلك العطشان
وثورة في غرفة الإنعاش
وراضي بغربة الأوطان
وبايع كلمتي ببلاش