ف وسط الزحمه
بضحك ضحكه
مليانه هموم الكون
ومرسومه على خدي
بخط اسمر ومتحاوط
بمليون لون
واكون مجنون
لو ازعل مره
واكشر
وتنزل دمعتى م النن
وقلبي يحن
ويستسلم
فموت من جوا
احلامى
وايامى
وانا عايش بضحكه
عاليه مرسومه
مابين الخد
لكن دبلانه
ع الشفه
وبتشقق شراينى
من الاوجاع
فيا عمري
انا بايعك باحزانك
ورافض ضحكك الزايف
لكن خايف
احس بسكره الاموات
واموت بالبطء
وقبل ماتشتري روحي
اكون عجزت
لكن ع الوش لساها
بترسم نفسها فيا
فيا هي
ياقاتلانى
ف وسط الزحمه
متكفن ودفنانى
ومتشعلق مابين نفسين
نفس طالع
وواخد ثانيه من عمري
وانا وياه
نفس داخل
وزارع فيا كام آه
لفرح وتاه
فيا بسمه
ويا ضحكه
فيا هذا
وما بيا
انا رافض اخون حزني
بكام ديه
وكام ضحكه
ومتزيف بحبه فرح
وانا اصلا
ف وسط الزحمه
متحاوط
بهم الكون
ومتغزل بتوب الحزن
..............
مروة سليمان