**************
أمى ماتت
كل شىء كان حلو مات
واللى حلو ولسه جاينى
برضه مرّر من سكات
كل حاجه مشتاقه لك جوه منـّى
نفسى جوه الحضن ابات
لسه فاكر لمّـا كنت جنب منـّى
زى ما يكون من ساعات
كان منايا اهــــــديكى سنـّى
لجــــل تحلى الإمسيات
..................
مين فينا الميّت جاوبينى ؟!
لو عايش ادينى أماره
انا بعدك ميّت مش عايش
أو عايش وف حلقى مراره
بأتمنى اليوم اللى ح اشوفك
بأستنى اليوم اللى ح اقابلك
مش بس يادوب يعنى زياره
..................
من غيرك لمّا ابكى يا أمى
تحضنـّى وتفرش مناديلى
مين غيرك ح يحس بضيقى
يفتح ف كفوفه ويــدّيلى
وانا داخل كنت بأبوس إيدك
وانا خارج كنت بتدعيلى
بأفتكرك ف اليوم ميت مرّه
مين غيرك بالخير ح يجيلى
مالك يا ابنى ؟
زعلان من ايه ؟
معلش أبوك
ماتاخدش عليه
معلش حبيبى ح تتعدل
وتصب الصبر ف فناجيلى
.................
لو كان بإيديا أموت قبلك
ولا اعيش ف الدنيا الغدّاره
والله بأشوفك جوايا
ع الحيطه وعلى كل ستاره
وبأشوفك فى الشارع برضه
فى عيون الناس جوه الحاره
وبأشوفك من جوه عيونى
بترقينى من العين الضاره
.................
لو كنتى صحيح عايشه معايا
انا كنت لا حابكى ولا أعانى
كان قربك فرحى وضحكايا
وف بعدك زادت احزانى
من بعد ما كنت انت اللمّه
دلوقت أنا عايش وحدانى
وكإن الخــــال ويا العمّه
نسيوكى ونسيم عنوانى
بإدعيلك بالرحمه يا أمّى
ويارب الجنه تخشيها
بقرالك فى ياسين وبأسمّى
والفاتحه عشان بأهديها
..................
من بعدك الفرح الباهت
بقى كله جراح
والفرح ماهوش عاوز يرجع
من بعد ما راح
والكل شايفهم قدامى
زى الأشباح
مشتاقلك والله كتير يا أمـه
مشتــــاق لحنانك والضمه
يا عبير فوّاح
........
أحمد حسن عمر
ماشاء الله عليك روعه
ردحذف