صباح لاتنين
الشمس ما جاتش معاد اليوم وما فاتش صباح
بياعة الحب عليها ملام
وف سوق القلب ضجيج وزحام
ومشاعرى فواكة دبلانة
أحاسيسى البايرة السهرانة
عاوزة استفتاح
اللحظة طرية ومعطوبة
والأمل اسوّد كأنه حديد
هربان من حبسة تفاح
والسعر رخيص للمعنى الضارب جدر الروح
والآه ببلاش
بياعة الحب انا الشارى
كل اللى معاكى بأشعارى
ولو ان انا عارف إن قصايدى
بجانب حبك ما بتسواش
فدادين جوايا كأنى براح
ومشاعرى اتفضحت فى الملئة
أعصابى معليهاش ولا خلقة
أنا طالب سترك وأمانك
والله انا عقلى من البندر
وضميرى بيعمل فلاح
الشمس ما جاتش معاد اليوم وما فاتش صباح
بياعة الحب فى سوق لاتنين
انا وانتى جوزين طايرين على كل بنانى الحب
وجت العرافة تبين زين
ما لقيتش عنيكى تبينهم
كت عينك فين
انا عيشت ساعات مولودة سفاح
رغم ان انا شاعر بيكى حلال
وجبينى العرقان ف هواكى داير سواح
الشمس ما جاتش معاد اليوم وما فاتش صباح
بياعة الحب الصابح غايبة بقالها سوقين
ولا عدى عليا اصباح الخير
وكأنى ما أصبحتش بلدى و الطعم مخيف
دقات القلب الشتوية طلعت فى الصيف
والفكر المغشوش بالمية
وعنية الرايبة المغلية
بتشوف تخاطيف
وبقييت كييف لنشوق الدعوة المطلوبة
يرحمك الله
بياعة الحب الغايبة عن السوق المعتاد
منك لله
كان نفسى ف طعم النظرة الأصلى اليوم
كان نفسى أبل الريق بحنان
كان نفسى ف ضحكة تكون ريان
كان نفسى القلب يرعرع يعمل صوتى خضار
كان نفسى يكون اليوم دا نهار
خلانى بعادك امص المر
وبعادك خلى العمر قديم وبدود
والفرحة المخلوطة بريحان الهمس
وبجوزة الطيب وبحبة بركة حب الحب
خلاص معادتشى بتعمل وش
والشمس اللى بتغرب من بين جنبات الشوق
بتنز بشرش
والضل بيتباع على عوده
الشبر بقرش
لسه هاستنى كمان اسبوع
ومشاعرى عاوزه تترّم
كان نفسى اشوفك واسمع صوتك واشعر بيكى
وازود بعض كرات الدم
لكنى هاحاول تانى اشوفك فين
ويجوز الخط يكونلى متاح
والنمرة المره دى تجمّع
واسمع ع الناحية التانية ألوووووو
وآخد من نفسك مصروفى واجيب أرواح
الشمس ما جاتش معاد اليوم وما فاتش صباح
...............
حمدي موسى