الجنّه للجدعان
حلم الشهاده يا مصر للجدعان
حق الشهاده يا مصر للجدعان
والرد لازم يبقى في المليان
..................
دمّنا من دمّ مصر الطيّبه الطاهره الأمينه
من عصير طوب الحواري
............. العايشه ع الصوم والسّكِينه
مستورين بالحلم دايمًا والبيوت المستكينه
دمّ دير/ جامع/ كنيسه
دمّ مريم أو نفيسه
دمّ وولاد الخسيسه
................... نكّلوا في الأرض بينا
........
طاهره جابت خلق طاهر
ناس حقايق مش مظاهر
ناس في سوق الناس جواهر
نفسي أقف وأهتف وأجاهر
........... مصر يا ولاد اللذينه
......
دمّنا من دمّ مصر الطيبه الجامده العفيّه
اللي ساعة الخوف مدافع
................. واللي في الموت بندقيه
واللي واقفه تقول أنا الحرّه العصيّه
.... أصل فوق الأرض والعالم هفيّه
اللي واقفه تباهي بالنيّه السليمه
والخطاوي الواثقه برجول مستقيمه
والقلوب الماشيه بتدوس ع الهزيمه
والأيادي الرّافعه راسها بمدفعيه
......
مصر مش صرخة قليبي
.... ومصحفي حاضن صليبي
مصر يعني الحق صاحي
.... وكلمتي دايمًا في جيبي
صوتها مش صوت عندليبي
صوتها صوت البياعين والقهوجيه
صوتها صوت شاعر عوَج ليها الطاقيّه
سلسبيل سايل وقنديل في الغوريّه
مستكّه وعنّاب وطشّة توم وغيّه
صوت هديل فرد الحمام جوّا البناني
صوت حيطان بيت ناشي يسأل مين بناني
صوت زناد في الليل حفظ بصمة بناني
صوت قناني الزّيت على ضرب الرّوسيّه
صوتها صوت بنت البنوت المستحيّه
صوت عاشور الناجي.. نبض الثورجيّه
صوت نجيب محفوظ في حيّ الجمّاليه
.....
دمّنا من دمّ مصر الطيّبه مهد الديانه
دمّ ما بيقبلش خاين
.................. أو تهزه ف يوم خيانه
دمّنا دمّ الجناين والعماير والخزانه
محترم حافظ مكانته، وحرّ لو حسّ بإهانه
دمّ عارف يعني إيه كلمة أمانه
يعني إيه الحق ييجي من
............................... "الجبان ابن الجبانه"
دمّنا من دمّ مصر الطيّبه الطاهره الأمينه
يعني من طين الشوارع
يعني دمّ معاه حصانه
................
الجنّه للجدعان
حلم الشهاده يا مصر للجدعان
حق الشهاده يا مصر للجدعان
والرد لازم يبقى في المليان