اللى قبر..... امى
سلام على القبر والشاهد
على صباره بتناهد
تقيم حيلها . على الطين اللى بيشيلها
وتضحك لما بنجيلها
وبتقوله عليك الدور
عواف يامه . على الصحبه. وعلى اللمه
وعلى الورد اللى مالى السور
وعلى الايد اللى بتطبطب
وعلى الريق اللى بيرطب
شعاع النور
سلام على الصدق والنيه
..........
سبتي عليا مين
يحرس لي مأدافي
ويحط إيد واتنين
ويدفي ف كتافي
سبتي عليا اخوات ؟
عشره مابين أموات
ساعة الوجع بنفات
يابخت واحد مات
سليم ومتعافي
........
سبتي عليا مين
يخبط علي بابي
يخبز عجين وطحين
ويسيبه ف اعتابي
مين اللي تقل مين ؟
الحزن في كعابي
.......
سبتي عليا الزمن
بسلاحه وجنونه
ودفعتي ليه التمن
ويشيلني في عيونه
مين اللي قال الديب
هو اللي حيصونه
..........
سبتيني ليه ياماي
للدنيا ووحوشها
والخلق شوفي ازاي
جاياني بجيوشها
وانا الوحيد ع الباب
لا عندي سيف وجراب
ولا املك الاسباب
مين اللي حيحوشها ؟
.........
زعلان قوي والشوق
يامه مالوهش حدود
محبوس وجوه الطوق
مات الوتر والعود
حتي اللسان بيدوق
طعم المرار والدود
.........
سبتيني يامه لمين
لابنات ولا صبيان
كان يجري ايه لو كان
متنا في غمضة عين
هو الكفن حيبان
لو لفوا فيه اتنين ؟؟؟