اضحك ...
خلّي الصورة تطلع حلوة
أعزف على أوتار أحزانك مليون غنوة
شِبّ برجلك .. حاول تلمس قرص الشمس
هات من نورها شعاع للغد
واحرق كل حروف اليأس
ابني ما بينه وبينك سد
أوعى تخلّي العمر يعدي قبل ما تفرح
انزل واطلع ..
سافر وارجع ..
دا الكون واسع تقدر ترمح
مهما الشجر اتأخر ثمرُه لازم يطرح
أعمل من أحلامك مركب
بحرها صافي وشطها مرمر
ابني وعمّر ..
علّي وكبّر ..
حتى ان كان الملح بيشبه لون السكر
حاول يلاّ وانا متأكد أنك تقدر .
حاول تكسر ..
حاجز خوفك من جوّاك
إسعد نفسك مين خلّاك
تبقى فـ حضن الحزن أسير
وانت الفرحة بتتمناك
حابس نفسك جوا الماضي
ليه مش راضي بالتطوير
وانت بطبعك ..
ربك صنعك ..
مخلوق قابل للتغيير
طول ما الدنيا لسه بخير
إمسك فيها ..
أبقى عليها ..
حتى ان كانت قاسية ومُرة
انت وبس اللي تحلّيها
انت وبس اللي تحلّيها .
__________________
محمود السيد