الشوارع هى هى
والأماكن هى هى
لسه فيها الحزن ساكن
جوه قلبى وف عينيا
لسه عنها الفرح غايب
لسه مش لاقيه الحبايب
واللى حاضر واللى غايب
السعاده عنه دايما مداريه
تايه بينا ..وتايه فينا
ويا أحلامنا الحزينه
بنداريها وتدارينا
والهموم أهى جايه جايه
مهما أحاول انسى همى
وأستخبى ف حُضن أمى
بألقى خوفى جوه دمى
وألقى حُزن الدنيا فيا
نفسى أرسى ف أى مرسى
وأنسى جرحى اللى ف ضلوعى
وأحضن الأيام وأنسى
مُر كاسى.. وطعم جوعى
نفسى مره واحده أرسى
وألقى ليا أى مرسى
نفسى أرسى ونفسى وأنسى
كل أوجاعى العافيه
بس خايف أصلى شايف
دمعه فاتت نن عينى
نازله تجرى ع الشفايف
فيها جرحى من سنينى
لسه خايف أصلى شايف
الشوارع هى هى
لسه شايف قلبى خايف
والأماكن هى هى
.........
رضا أبو الغيط