ليه قاضى واحد فى الجنه
واتنين فى النار
سؤال وبجد ياخواننا
خلانى احتار
وقضاه عارفين نص حديثنا
والقائل مين
والقائل سيدنا وتاج راسنا
صادق وامين
وبرغم دا كله تلاقيهم
يجنحوا يااصيل
ودلايل الحق ف اياديهم
لكن بتميل
وقليل اللى يراعى ضميره
وعادل ونزيه
ماياخدش وصايه من غيره
ولا يعرف تيه
والنسبه فعلا ياجماعه
واحد لاتنين
دا كلام من صاحب الشفاعه
جد الحسنين
انذار والمنذر دا رسولنا
ماتصلوا عليه
جميع احاديثه بتعدلنا
وبيوحى اليه
فى زماننا الحاضر بان لينا
صدق الاحاديث
القاضى اهه بيلعب بينا
شغل الاباليس
وقضاة الحق المعدوده
هجروا منصات
معروف اعدادهم محدوده
عايشين ازمات
والفاكر ان احنا عبيده
ويقول انا سيد
وينسى ان المنعم سيده
والكل عبيد
يارب ارحمنا وانصرنا
على ظلم الناس
واكفينا شر اللى قهرنا
هذا الوسواس
..............
احمد عبد الوهاب
( ابن بيرم )