شكراً ع الجـــــرح
اللى بيثبت إنــك كـــداب
شكراً ع الفــــــرح
اللى نسيته وبسببك غاب
شكراً ع بيــع اللى جمعنا
وبدون أسباب
شكراً لها أكتر من معنى
شكراً دى عتاب !!
*****************
شكراً على ظنـًى اللى خدعنى
وف حبك خاب
شكراً على قلبى اللى وجعنى
وف عشقك داب
شكراً ع الدرس اتعلمته
وفهمت خلاص
إن الطعنات اللى بتألم
جت م الأحباب
************************
شكراً على انى ف مشــوارك
ضيّعت سنين
وجازيت القلب اللى اختــارك
خلّيته حزين
شكراً على اخلاصك ليا
شكراً يا آمــين !!
شكراً على جرحك ومرارك
شكراً يا عذاب !!
***********************
شكـــراً على دقـــة تمثيلك
دور العشاق
شكراً على قسوة تحطيمك
قلبى المشتاق
شكراً على بعدك ريحنّى
شكراً يا فراق
شكراً لها اكتر من معنى
شكراً دى عتاب
****************
شكراً للدمعة اللى واستنى
وقت الأزمات
شكراً للوحدة اللى باستنى
وقالتلى حاجات
قالت من باعك قوم بيعوا
ولا تسأل فيه
اعتبره سحابة صيف عدت
أو حب ومات
وإن قفل ابوابه واتسددت
فى مليون باب
شكراً لها اكتر من معنى
شكراً دى عتاب
شكراً
دى
عتاب
*****************
أحمد حسن عمر