وتسوى الدنيا إيه يعنى بدون رؤية
وليه يعنى نعيش عميان
وليه نمشى بدون وجهه
نردد كلمة قالها فلان
وليه نرضى الوقوع ف الأسر ونسلم
مانتكلم مادام ربك عطانا لسان
نقول الحق ساعة الحق ما ينادى
ونصرخ لأ بعلو الصوت
إذا كانت فدا بلادى
وبرقبتى ماقولشى كلام مانيش فاهمه
ولا امشى خلف أى قطيع
انا اصلا ماحبش اكون لحد مطيع
انا دماغى كما الصوان
ولا افهمشى غير الدوغرى
ولا احبش اقلد حد من صغرى
انا إنسان وليا العقل والمنطق
ولو مش عاجب السيد
ياعم يطق
انا مقلعشى جلابيتى ولا بالبس عباية حد
انا من صلب راجل حر
ابويا قاللى إوعى تضر
متعديش على كل الكلام وتمر
فكر فيه......ومن يومها
باشغل مخى ع الفاضى وع المليان
وباعمل للكلام دراسات
وافكر بس فى النقطة عشر مرات
مانيش مع دول ولا مع دول
انا لوحدى جماعة وحزب وحكومة
وانا الريس
وحاسس إن انا كويس
ماليش ف اللف والدوران
باحب الحب لما يكون من الحصرى
ماحبش أى حد شريك
فريك يعنى ياعم فريك
متفرقشى بلاش تلكيك
واحب الشعر بجنونه
اقول الحرف م النونو
ولا احبش اقول كلاكيع
انا العصبى اللى ما يقبلشى يبقى لكيع
وحامى الدم
مش هاتلم غير لما أشوف العدل فى الموازين
واشوف الحب ف الدكاكين
بقرش الكيلو واطلب برضوا يتوصى
واشوف البنت زى زمان
تموت لو بانت القصة
واشوف استاذى زى ما كان
بيدى الدرس ف الحصة
واشوف العافية تتفرق على المرضى
واشوف الشوك بيقدر يحرس الوردة
ونرجع تانى بنى آدميين
نصلى لربنا وحده
فاقولوا آمين
...............
حمدي موسى