بقينا ليه بنتحامل ونتعامل
مع بعضينا كـ الأغراب ؟.
بنكره بعض عـ الأخر
ونتعادى بدون أسباب
ونستنى يَدوب غلطة
ونحسب ليها ألف حساب
ونتلكك على الكلمة
ونعمل منها ألف كتاب .
مين فينا بس ألقاه
وسطينا مش معيوب
مين فينا كان معصوم
ومَشَلش ياما ذنوب
امتى بقى نتعظ
نرجع قوام ونتوب
نترجى رب الكون
يمكن علينا يتوب
ننسى وبلاش نفتكر
مين فينا كان غالب ..
مين اللي كان مغلوب .
قسماً بذات (الله)
دنيتنا ليها العجب
ملعون أبوها حياة
الحب فيها اتسلب
والود ضل وتاه
والكره فيها .. غَلـَب
الأصلي بقى مغشوش
والقشرة صبحت دهب
والناس بقالها وشوش
مبقاش عاجبها العجب .
فاكرين جحا وابنه ؟؟
قصة وعارفينها ..
من واحنا لسه عيال
عارفين وحافظينها
ركبوا الحمار ..الناس
قالوا صحيح ظالمين
حرام عليك يا جحا
يابني الحُمار مسكين
نزلوا قوام الجوز
وشالوه على الكتفين
بَعديها قالوا الناس
الواد وابوه .. مجانين
سابوا الحمار يمشي
قاموا ضحكوا عـ الاتنين .
فَمتزعلوش دا الورد
ياما لـَموه لايمين
مالقوش في شكله عيب
قالوا يا احمر الخدين .
حتى الرسول نَفسه
كَسروا العباد نِفسه
طه نبينا الزين
هو كمان ما سابوه
في العرض ويّا الدين
وف سمعته سبّوه
وبكل قلة أدب
لَعنوه سلالة ونسب
ودا كله من غير سبب
رغم انه كان الهدى
وراحتنا بعد التعب
رغم انه علّمنا
حب وفضيلة وأدب
اللي الإله كرَّمه
ذكره في كل الكتب .
يا عم اضحك بقى
سيبك من الكَشرة
دا الحزن لو طوّل
بيكَرمِش البشرة
فيه ناس بتشبه جراد
أمراضها منتشرة
يتمنوا كل المراد
يشوفوا فيك حَسرة
نصيحة واسمعها
كمّل ولا يهمك
واياك تبص وراك
أو يتحرق دمك
ولا تتنزلش فـ يوم
عن عشرة من عشرة
وابقى افتكر دايماً
النحلة رغم العسل
وصَفوها بالحشرة .
_______________
محمود السيد .