وسط الزحمة
قلبي التايه داير يمشي يفتش عنك
وسط الزحمة حاسك امي
واني ضناكي وتايه منك
وسط الزحمة بالاقي وشوش
فيها ملامح معرفهاش
متغطية بلون ورتوش
بس اللون مابيستناش
فيها الشاري بيدفع عمره
والبايع بيبيع ببلاش
وسط الزحمة بانادي عليكي
بازعأ اوي مش سامع صوتي
وارجع تاني أعيش ف سكوتي
والعن موتي
خايف وسط الزحمة تفوتي
زيك زي بقيت الناس
وبتبصيلي زي عيونهم
نظرة عين من غير احساس
قلبي يقوللي ماتتعب روحك
وسط الزحمة ماتوهنا خلاص
والقى الناس بيغطوا في جسمى
بالجرانين والخلق تصوت
والمح جسمك يحضن جسمي
واعرف اني ف حضنك ميت
تنزل دمعة جوة عنيكي
سخنة تبل عيوني وافتح
والقى الناس بيقولوا لروحهم
الحق ياض ده الميت فتح
اصل الناس ديه ماعرفينش
اني مماتى الحضن دواه
وان انا ميت بس في حبك
وان الموت وياكي حياه
............
محمود صبري الشريف