سبعيــــــــــــــــــــــــــن سنه
لما يابويا الشعر شـــــــــــــاب
وبفرشته رسم الزمـــــــــــــن
على جبهتك تجاعيد فرح ..
تجاعيد ألم... تجاعيد عــــــذاب
لمعة عنيك .. أثر السنين
فوقهم على النّنى ضبــــــــاب
حتى الحروف متكسّـــره
فوق الشفايف م العتــــــــــاب
والورد فوق خدك دبـــل
منقوشه فيه كل الصعــــــــاب
سبعين سنــــــــــــــه
وانت اللى كنت بتعافر هناك
وانت اللى كنت بتسافر كتير
وقلوبنا بتسافر معــــاك
يابو قلب أنعم م الحرير
سبعين سنـــــــــــــــه
راح فين جمال عز الشبـاب ؟
قلبك كبير بيلمنـــــــــا
ويضمّنا عند اللــــــزوم
الضهر من شيل الهموم
كَل وتعب لمّا انحنــــى
الكلمه من بقك عنــــب
كل الفواكه ف الونس بتشدنا
دمّك خفيــــــــــــــــــف
يابو ضحكه تشبه للنسيـــــم
ف أحّر صيــــــــــــــــف
رغم الكبر لسّاك جميــــــــل
كما نجم ساطع جوه ليل
بتنام كتير حكم السنيـــــــن
ف الفجر بتقوم .. معجــــــزه
قبل الأدان
تسمع آيات الذكر والقـــــرآن
من يوم ما عقلى
استوعب الأشياء وانــــــــــا
بلقاك تصّلى الفجر حاضــــر
من زمــــــــــــان
!
ترجع تولّع منقدك
وتكح كل البيت يقـــــــــوم
وتقمّر العيش الطرى
وتصّب شاى تاكل رغيــــف
وتغمسه بالملح ابو كمون جميــــل
ياننّى صادق ف العيون
عمرك ما خنت ولا افتكر إنك تخــون
فلاح بسيط قلبك حنيّن فيه سكون
ف عنيك يابويا الحب ...كــــــــــــون
بالقاله جوّه عنيك ....
انا ميت ألف لون !
واكمنى آخر العنقود تعود
تسأل وتطمن كتير وتودّنى
جوّاك حاجات بتشدّنـــــى
معنى الأبوّه والحنان..
معنى الأمان
والعيله والإحسان كمـــان
وحاجات كتييييييييييييييير
قلبى الكبير بيحسّها زى العبيــــــر
وانا مهما اقول كل اللى قلته
يادوب ده جزء من الأصـــول
جوّايا معنى كبيـــــــــــر أوى
أكبر يابويا كتيــــــــــــــر أوى
من أى قـــــــــول !!!!!!!
............
شعر : طلعت سالم