وحده غريب ...بقلم الشاعر المبدع / حمدي موسى

ومتفكرشى فى اللى انت مصمم انه أحلامك
مفيش احلام
ياريت تنسى ان فيه بكره
وحاجة اسمها قدام
وعيش اللحظة بعيوبها وبذنوبهاولاستغفار
وسيبك من أمل معووج
قانون الفرح كله عوار
مفيش دستور ينظم سكة العاشق
وكل القائمين ع الأمر
مش عاوزين يشوفوا القلب م الأحرار
فأحسن لك تعيش وخلاص
عشان إيمانك العلنى يودى النار
وهات تانى عشان لسه الجدار منهار
ناولنى الحزن فوق الحزن فوق الحزن
تجرى م الدموع أنهار
مادام النيل بيتمايص
ومش عاوز لا يروى الزرع
ولا عاوز ينز خضار
ومتفكرشى تبقى إمام
مادام اللى وراك جاحد وم الكفار
مفيش استسقا راح ينفع
عشان قلب السما خالى من الأمطار
ولسه كمان
ناولنى الصبر فوق الصبر فوق الصبر
محتاج الوجع مدماك
نعلى الآهه فوق الآهه فوق الآهه
تنحاش الحروف ف حشاك
وتتعلم تشيل الجرح من جدره
وتكوى العرق قبل الدم
ما يعمل بطبعه معاك
يسيل منك تشوف إنك
بقيت متفضى من جواك
تعيش غايب عن الوعى
اللى هوه م الأساس كاره
يعيش وياك
ناولنى قصيدة م اللى هناك
نحط الشعر فوق الشعر فوق الشعر فوق الشعر
نعمل م الكلام شباك
يوصلنا لآخر نظرة مكتوبة
يجوز التوبه تسمع إننا عاشقين
تفوت ع الذنب تكتبنا مع التايبين
ونبدأ تانى من صفر الشعور البكر
نرجع تانى يا صاحبى ونبقى اتنين
انا وانت ولا يبقى علينا رقيب
يعد علينا إحساسنا
نعيش على كيفنا
لو حتى نعيش الحب بالتقريب
ونتمنى ونتمنى ونتمنى
لغااااية لما
استنى
انا معرفشى ليه حاسس
بإن انت مهوش انت
وحد غريب

..................

حمدي موسى