(حلمين وإتوصى) .......... بقلم الشاعر / محمد السيد السلاموني

مقدمه
.......

الحلم للجدعان.
إيه يعني لما تحس
روحك ورا القضبان
وعنيك تملي مفارقه
وشارده عالعنوان.
إيه يعني الأمل عدى
وخدك معاه مشوار
وف اول الطريق
سابك هناك ورجع.
الحلم للجدعان
وإنت مش جدع.
........
1
إديلوا فوق حلمه
حلمين وإتوصى
لما تلاقيه بيرص
ماتهدش الرصه
تاعباك أحلامه ف إيه
خايف تتكعبل فيها
تقع منك روحك
تقوم تمد إيديها
وإنت اللي معودها
ماتمدش إيدها لحلم
لو حتى حايقومها
وانا اللي كنت باقول
وئد الحنين ظلم
صرفت حنيني عليك
وئدتوا من يومها
وإنت شوفت النحل
على جناح الرضا
شايل حنانه بود
ويفتح في قلب الورد
سكه للندى
ولا ده يبص لشوكه
ولا ده يبص للسعه
شرب الحنان عالريق
خلا القلوب واسعه
وإنت وسط النحل
متغطي بالقسوه
ويعمل إيه الحرص
في لحظة النسوه
والكل بيفتح فيك
سكه للدخول
وتخبي إيه في روحك
وإنت البعيد موحول
وساترك المنحل
شوف جسمك المنحول
من كتر ماإستوحل؟
..........
2
عاش عمره يرسمها
مسك فإيده الريشه
ومن بياض قلبه
بيض كل السواد
وساب سواد عينها
علشان بيضحكله
وكانه مش منها.
..
وفمره كان قاعد
وياها في الرسمه
تقوم تقع نقطه
على خدها تنزل
ترسملها دمعه
هوه كمان دمع
فاحب يرضيها
رسملها ضحكه
وصوتها بيسمّع.
و يلوّن الجناحات
لحد أخرها
يبص عالبدايات
يلقاها بهتانه
يرجع يلونها.
تبهت النهايات
يرجع للبدايه
اللي إبتدا منها
هوه كده علطول
بيجري في سنينها.
..
يحايلها في الصوره
علشان يطلّعها
مارضيتش تطلعله
دخلها هوه..
شوفت إزاي حلمه
ماخرجش براه
وحاضنه من جوه.
شوفت إزاي حلمه
بنار المستحيل
داير بيتسّوى.
.......
3
لما كلم الفراشات عنها
بقى كل الورد بريحتها.
لما قعدت تغسل عبيرها
بالروح على شط وجوده
بقى بيتنفس منها .
حتى الموج اللى جاي
مشتاق لعيونها جري
بقى ميت بيحضنها .
ولما صلى اليأس
على سجادة حلموا
قام ولم الدموع
من عيون الناس
وحلف على الاحلام
ليبقى من دينها
.....
نهايه
.......
إديله فوق حلمه
حلمين وإتوصى
لما تلاقيه بيرص
ماتهدش الرصه
أخدت كام عسل
إتحمله في قرصه
هايحصلك ويموت
لو بس خد فرصه.
.........
محمد السلاموني