الصوره وضحت والرؤيه
حمار وداير فى الساقيه
هانت واهى ايام باقيه
دى الترعه جفت مساقيها
لا الارض شربت ولا حاجه
رغم انها بشوق محتاجه
والقمح جابهولنا خواجه
بالدين وادى جيوبنا مافيها
سالت واد فلاح شاطر
عاقل ولا عمره يخاطر
هل الشقوق منها مخاطر
بين لى يابنى مساوبها
قال ارضى خصبه وجواده
ورزقها كان بزياده
بارت وخاصمتنى ياساده
مابقيتش سده اللى عليها
وانا اللى دايما باحرتها
واحط فيها بذرتها
وافرح فى ساعة غلتها
ساعتها اهلى باهنيها
ومن عامين فيه واد جانى
باين عليه واد شرانى
خد ارضى منى ورمانى
فى السجن انا من بعديها
واقول له دا الزرع شطاره
له مفهوميه ومهاره
ويشهدوا اهل الحاره
لو كلمه واحده اكدب فيها
وقال لى بكرا تشوف خيرها
روح انت بس العب غيرها
انا جامعها وانا ديرها
وانا الطبيب رح اداويها
والارض قدامك يابا
دى ارض والا دى خرابه
عمرت تعالب وديابه
انا بادعى ربى ينجيها
............
احمد عبد الوهاب