ألبوم صور متنتورة
و ف كل صورة
ألمح الوش القديم
كل الوشوش متصوَّرة
معقود على جبينها أمل
واخدة مكانها
ع الصراط المستقيم
وحشانى دايما يا بلد
حتَّى و انا ماشى ف شوارعك
لو بافوت
من على كل البيوت
و ارمى سلامى ع الجميع
مين ده ؟ و ده يبقى ابن مين ؟
هات الصور
قول لى الوشوش دى تبقى فين ؟
البحر رايقة مَيِّته
و معاها صِفْيت نِيِّته
إحكى و فضفض و اشتكى
قول كل حاجة و احكى سرك
كل موجة جايَّة تضحك
شايلة حل
انسى جرحك و الملام
و اوعى يوم
يرجع معاك حبِّة كلام
عدِّى على أهل البلد
و ارمى على قلوبهم سلام
هتلاقى رحمة فْ ودُّهم
هتلاقى رفق فْ صدُّهم
كل الطيابة ف صدرهم
شيخهم غلام
جوه الصور
واقفين على الترعة سوا
نصطاد سمك
و الساقية دايرة جنبنا
غنوتها لسة عايشة جوه فْ قلبنا
بين الصور
عازم صحابى ع الغدا
و انا لسه طفل ف مدرسة
سلِّم أبويا ع الولاد و ضحك لهم
كان يومها عاجبه شكلهم
غاب عنَّنا
و فْ لحظة كان راجع لهم
شايل هدايا أرضنا
باعت سلام
كان قلبه طاير م السعادة
لمَّا بان فيا العَلام
يوم الخميس عيد البلد
كنَّا بنفرح
كنا نلعب
كنا عايشين الحياة
كان كل شئ فيها قليل
بس حلوة
كل كلمة فيها صعبة
بس غنوة
يا وشوش عاشت ما بيننا
فين ريحتكم
حد يحكم
هى دى ( شنشور ) زمان ؟
هو دا الوش القديم
اللى اترسم ؟
ولا الجديد اللى اتقسم ؟
مانتى اللى كنتى ألف ليلة
م الحكايات الجميلة
لما أبطال الحكاية
إتكتب ليهم نهاية
اختفت منك ملامحك
كل شارع كل حارة
ماشى فيكى
ماشى أدوَّر
مش لاقيكى
يا بلد
ناسيانا ولَّا
عنا مشغولة
راح فين جحا
فين أمِّنا الغولة
أو قولى فين أم الشعور
اللى ساكنة فى البحور
يوم الحصاد
راح فين صياح الفلاحين ؟؟
مَكَن الطحين ؟؟
و الطرقعة وقت العجين ؟؟
فين أبويا أمِّى عمِّى
جارى خالى
ولَّا جِدَّه تحكى أيامها الخوالى
فين ملامحِك
أصل وشك منها خالى
إتنست حدوتة حلوة
و اختفى ضىِّ القمر
ألبوم صور
قاعد بيحكى
ع اللى فات
شايل فى قلبه ذكريات
كل الوشوش اتغيرت
فاتت سنين
سايبة سؤال لكن حزين
مين ده ؟؟
و ده .. يبقى ابن مين ؟؟
........
وليد المليجي