ويجي الليل... ونتلاقى
سطور من نور ف صفحاتك
عليها مشاعري خلّاقة
ف وسط السطر
نار اسمي
ف تبتسمي
أقوللك ...ليه ؟
ترد عنيكي...مشتاقة
ف تتخانق حروف شوقي
مع حروفك
يجي دورك...تخانقيني
اغوص من تاني ف بحورك
عيون شطك تناجيني
صحيح فارس
أحسّك مهرة قدامي
ضفاير الشوق ف إيدي لجام
وأحسّك نسمة تتسرسب
ف وجداني
تغرّقني ف بحر هيام
تمدّي الآه
ف جوف صدري
تشديني
حبيبي إكتب على سطوري
آهات عشقك
وخلّيني
أحس الشمس ف سطوري
وقبل الفجر...إطويني
ولملم كل صفحاتي
وداريني
ولما الليل يجي تاني
تنادي عنيك...تصحّيني
نعود من تاني....نتلاقى .
..........
محمد البنا