نظره على الفيس ...بقلم الشاعر الكبير / أحمد عبد الوهاب

بابص بعينى لقيت الفيس

مليان رص مع التهييس
فين المعنى فين الموضوع؟

 عايزين نوضع لها متاريس
وحاجات ياما ملانه أخطاء

 فى التعبير أو فى الإملاء
واللى يغيظك بقى آل إيه

 بيقولوا ان احنا شعراء
الرصيصه دلوقتى كتير

 وانا ع الشعر ياقلمى باغير
عمال أدن بس ف مالطه

 هاتجيلى جلطه أنام فى سرير
ياما ناديت ياخلق حرام

 ليه بتعيشوا فى الأوهام؟
عاملين شعرا ازاى ودا ليه؟

 هو الشعر بيكسب كام؟
لا الأشعار بتأكل عيش

 والشعرا عايشين دراويش
جيبهم خالى لكن البال

 أبدا والله ماخاليش
حاملين هم الدنيا بحالها

وغيرهم ياما مش على بالها
إسرح ويا الشعرا وعيش

 رح تتمتع ويا خيالها
الشعرا الصادقين فى الكون

 تلاقيهم عايشين فى سجون
ورغم الفقر ومر العيش

 كله عند الشعرا يهون
ياللى ترصوا وبس كلام

 الشعر محتاج لعلام
مع موهبه من رب كريم

 نيجى نقراه ونقول ياسلام
إعرف نفسك وسط القوم

 قيّم نفسك با لمعلوم
وما تحرجشى النفس ياشيخ

 رح يتقال لك فز وقوم

.........

ابن بيرم