ياللى بدقنك لنا بتغر
-- حالك مايسر--
وعامل انك راجل حر
وشيخ وشريف
عايز كدا ف وسطنا تظهر
-- تعمل منظر--
وفاكر المشيخه مظهر
يابو العرّيف
فى شارعنا واقف بسيجاره
-- ياعم اتدارى--
ياميت ندامه وياخساره
على صاحب كيف
شغال وفى النصب علاوله
-- ناس مع دوله--
وبعد ييجى ألف محاوله
لك شكل سخيف
فى البصبصه وانت الشايب
--وراجل عايب--
طب اختشى حبه ياخايب
عامل حريف
تعاليم الدين مش مقصوره
-أصل وصوره -
فى حاجات مباحه ومحظوره
بتعاليم كالسيف
وردت فى قرآن أو سنّه
- تودّى الجنه --
والنار هناك وبتستنى
أهل التزييف
بعد ماتنزل م المنبر
-- تفشر تنبر--
وفى الحقيقه شيخ منصر
وبتلعب سيف
سكنك وعامله خماره
-- ياألف خساره --
والشهره ظهرت فى الحاره
وعامل لى نضيف
إبعد ياعرة إسلامنا
-- وكل كلامنا --
وكفايه زودت همومنا
بحبة تخاريف
المولى لو لكيوم يستر
-- ذنبك يكتر--
ومظهرك ع الدين أخطر
من لص شريف
النصب واضحه لنا أموره
-- وبان مستوره--
واللى بيرضى بغروره
نصاب ياخفيف
..........
أحمد عبد الوهاب
ابن بيرم