وبقولها ....أيوه بَجوع .
أيوه بَجوع ..
لانا محروم ولا طمعان
ولا مفجوع ولا سعران
ولا في الأكل ماحدش زي
ولا بَستطعم أيُها شي
بس باجوع ..
واللي قالوا لِك أكل الراجل
حبة دُقة وبيض وسميط
حد عبيط ..
أكل الراجل أصله مراحل
بس طبيعي ما بيخوفش
واما يجوع ما بيستحملش
ياكل فتة وياكل كبسة
ياكل حتى ان شاالله المش .
واللي تجّوّع مرّة راجلها
تبقى يا ويلها ...
أصل الجوع وصفوه بالكافر
زي ديابة وليها ضوافر .
طب لو عندك حتة عِجل
مش راح ياكل حتى الفِجل ؟؟
ولاّ هاتمنعي عنه الأكل وتربطي يده معاها الرجِل
لأ ده هاياكل غصبٍ عنك .. لو هاتحس المعدة بتُقل .
لو كان ينفع ...
كنت ماكلتش طوول اليوم
وعشان خاطر أرضي جنابِك ..
أعلن إني نويت الصوم
كنت عملت كمان عملية اسمها تدبيس
بس ازاي اعمل عملية .. هو انا سيس ؟؟
ثم الأكل حكاية نِفس
أصل الأكل حكاية نِفس
قلت هاسيبها تجوع وتحس
بكرة تحس ...
بعده تحس ...
ده انا من كتر الجوع راح اخس .
ماشي طماطم ماشي خيار
مش بَطلب كفتة وكفيار
ماهي أصناف الأكل كَتير
وانا ما بقولش اعملي ممبار
هاكل لو تطبخي .. مسامير
بس تخلّي الأكل يا مرتي ..
دايماًَ يبقى .. ملحه كَتير
وانه بلحمة يكون مصنوع
ولاّ الملح كمان في قاموسك .. شيء ممنوع
وان كلامي يكون مسموع
واني بَجوع .
_______
محمود السيد .