قرب لاخوك
مدّ الخطاوى والإيدين
افتح دراعينك قوى ع الناحيتين
لمّ اللى واقع م الحياة
وفق مابين النظرتين
ازاى هتمشى ف سكة واحدة
بعين وعين
واحدة تنظر للشمال
والتانية ناظره لليمين
إوعى تقول انت ابن مين
هوه ابن آدم يا أخى
وانت ابن حوا
انت هوّه
كلكم واحد صحيح
كلكم راجع لآدم
حتى لو كان المسيح
قصدى راجع للتراب
ومفيش هنا صاحب عتب
كله بعقد حساب
اول بنوده للورى
خيرا يرى شرا يرى
مختوم بختم الزلزلة فوق الجبين
يعنى ايه واحد فقط بتقسّموه اتنين
يابن أم ويابن أب
بعض رحمة ...بعض حب
مهما كان بينك وبينى
مهما كان دينك ودينى
فى النهاية لينا رب
انت فين دوّر علىّ
هتلاقينى لو انت عاوز..... مرتين
شد حيلك...شد بيّا
اختلاف البصمة وصمة ع الإيدين
قسّم جروحك ع البدن
الآه تروح
هتعيش من الأمس لغداً
إفرد حبال الروح
لو كنت راسم ع الخلود
إروى بدماءك أرض اخوك
وتقاسموا فى جنة عدن
مفيهاش حدود مفيهاش صكوك
إوعى تسلم جتتك إلى بعض تجار البشر
ليقطعوك
اوعى تلف ف دايرة جاهل قطرها
ليدوخوك
اصل الحكاية كلها .......(لتعارفوا )
( إن أكرمكم ) مطرز بالتقى
والموت وصل قبل الحياة
فلمن يكون المشتكى
الله يا الله يا الله
آه يابن آدم يا ظلوم ويا جهول
هىّ الأمانة جتتك
ولاّ الأمانة دولتك
ولا الأمانة سبحتك
ولاّ الأمانه فى العقول
ازاى لسانك طول كده
والحق مش عارف تقول
ارجع لطينك واختشى
وبلاش تحاول تنتشى
الأرض مش هتحس بيك
ولا الجبال هتطول
اقرأ كتابك فسره
عمرك طويل .
.انت ليه بتقصّره....ياقابيل
لم الملامح والجينات
هات الورق ارسم بشر
زغروطة يتبعها صوات
أصل الحكاية كلها
مولود ومات
..........
حمدي موسى