يا قطر العمر يا محمِّل كتير أحزان
باقولك إيه من الآخر
ما تيجي فى مرة نتفاصل
على الرحلة وع الأيام
يا تاخد الباقي وتروّح
يا تعـتـقـني من الأحزان
أنا مصلوب ومتكتف على القضبان
فلنكاتك تملي حديد
ولا بـتلين لأوجاعي
وانا المدبوح وسال دمي على كفك
ولا يكفك عن الجريان طلوع الروح
ما تاخدها ويلا تروح
مادام عشمي فى أفراحك بقى أوهام
محطة و تانية أقول هانت
ألاقي التالتة ف السابعة
وهااااااااات يا جروح ...!!
تقيل حملك
ف نـزِّلي شوية حزن فى محطة
عشان اقدر أكون وياك
وهدِّي شويةع السكة
وسيـبـني أبوح
وبـِلّ الروح ولو مره
بحضن حبيب
وطلِّة عيد
عشان اشفي ولو لحظة
وجرحي يطيِب
ده انا وياك من الأول و للآخر
و حقي عليك من الاخر
فى يوم إفراج
كفاية عليك سنين العمر عبّتها
جراح وهموم
فريّحني
و خد لياليك
وسيّب الباقي للدنيا
ومتاخفش
لا يوم ح ابكي على فراقك
ولا ح ادعي ف مرة عليك
ولو دمعة ملت عيني على اللي راح
هاقوووول سامح يا دمع العين
قدر مكتوب
ولو ما رضتش بالقسمه
عشان خاطري تريحني
وعبِّي الباقي م الرحلة
وخدها و روح
.........
بكري جابر