السنيلات الخضر راحت تشتكى
منديل معطر
بالضماير
منديل وكانت صرته
وسط النهار اللى اختفى من سترته
تحت الزراير
من يرد طوبه بتختفى؟؟
والا الرطوبه بتصطفى حر المشاعر؟
طب كنت فين الصبح لمّا
فرقت
بينا المصاير؟
كنت اللى صاير ع البساط المعتدى
تفرد ضفاير حضرتك بين الحدود اللى اختفت
والا انت عاشق تترسم فوق الستاير؟
والا انت داير
تلحس صوابع حضرتك
بعد الوليمه المؤلمه
وتقول مسافر
انت المهاجر ؟؟
انت المغادر؟؟
والا انت صوره للضراير
والا انت زاير للميدان اللى ماحدد خطوتك
حالف يبدد ثروتك
طول ماانت عاشق
غربتك
فينك ياحاير؟؟
ممكن تحاور ؟
ممكن تناور؟
ممكن تبدّل بوصلتك؟؟
ممكن تغامر؟
قو لى انت فين ؟
هو انت فين؟
والمنتوفين الريش مابينكم
يختفوا
والمخطوفين بره الفضيله
بيهتفوا
عاش المضلل حضرتك
عاش المغادر
إنت المغامر؟
طب قوم وسمّع فى النشيد
ياابن الوحيد اللى ماضيع ثروته
ياابن اللى عارف قبلته
كل الوصيه فى كلمته
لو كنت قادر تنتسب
للموت بعزه
فالعزا .
يرسم طريقك منتزه
والليل سواقى بتنكسر فوق السراير
اثبت وسابق فى الخريطه
بصحوتك
وازرع أصالة فكرتك
تطرح بطولة فى قلب بكره بيتولد
يطرح بشاير
...........
محمد مغاوري