جوا دفاتر حبى التايه
تحت سطور مليانه مواجع
ماشية حروف
مش عارفه خطوطها
زى مراكب
جوا بحورها
بتسأل امتى
هتلقى شطوطها
باكتب ليكى بقلمى النازف
عازف لحن
فريد من شوقى
عايزك مرّه
ترِقْى تروقى
فـُوقى
طفى لهيب البعد لشوقى
بصى ف وش مراية نفسِك
اوعى خداع الكدب ينافسك
خشى ف حضن حنانى ودوقى
هاتى شريط الذكرى بتاعتك
شوفى معادى ف رنة ساعتك
شوفى اللهفه على بعضينا
ليه ارضينا ؟!
ننسى أحلى شئ فى ماضينا
تمحى الشك المالى
وجعنا
نلقى الحب
بينده تانى
نلقى الضحكه تشق طريقها
نلقى حياتنا تعود لبريقها
جوا دفاتر حبى التايه
نكتب كلمه بخط عريض
"رجعنا"
نمسح كل حروف
دبلانه
كنا بنكتب بيها
وداعنا
جوا دفاتر حبى التايه
..............
راضي الطهطاوي