مش عارف افرح ولاّ أحزن
الحكاية ملخبطة
لو يوم لقيت كلمة سعيد
يطلع عليها شخبطة
مشدود مابين الناحيتين
نصين أنا
معرفشى ليه نصى الشمال
بيعاند النص اليمين
وصل الخلاف حتى اللحاف
البرد مش طايق غطا
بين البينين
مقسوم على صيف و شتا
فصل الربيع مش من فصولى لاربعة
حاجات بتمشى بالبطئ
وحاجات كتير متصربعة
الآه مدار والخوف مدار
اتنين انا محناش سوا
الليل نده فين النهار
قام رد قال له جاك أوا
قامت خناقة ومعركة
على قلب خط لاستوا
النور رمادى والسنه دى
الجو مش باعت هوا
مخلوق غريب
ماسكنى شئ من قبتى
كائن عجيب
سيب مش هاسيب
يظهر بإنه مفيش نصيب
القى لصوت الآه دوا
ياعم قول انت عدو ولاّ حبيب
ماشى ورايا ف سكتى
يادى الخيال جننتنى وخيلتنى
ازاى اكون المستقيم وانت علىّ بتنتنى
هوه العامود الفقرى شايل مين هنا
جسم انحنى
ولا بيحمل روح بتاعة حد تانى
مش أنا
...............
حمدي موسى