ولما نروح لآخر معنى فى الكلمات
ونوصل حد سن الحرف
نتكلم
لكن دايما مفيش عاشق
بيتعلم
سوى بالهمس والنظرات
وانا شاعر يادوبك مات
ساعة لما لمس إيدك
هاقولك شئ مهوش معروف ولا مألوف
انا مجنون ومتأكد
على إيديكى ببات فرحان
ومتنكد
ومش فارق معايا الحزن والأفراح
ولا فارق معايا العمر جه أو راح
انا عايش على سيرتك
كفايه براح انا مخنوق
ومش قادر على بعدك
انا نصين
شمالى راح على اسمك
يمينى هج ماعرف فين
انا باحلم
ومش شايف حدود الحلم
ولا عارف تفاصيله
وتأويله ؟
انا مكسوف
ومش قادر احبك غير ببعض حروف
وآخرتها ؟
انا عاوز هوى ملموس
حبيبتى انا هنا محبوس
ماهو انتى فانوس وانا جنى
فاشبيكى
قوليلى عاوزه ايه منى يخليكى
كما الملكات
حبيبتى عاوزه تاج ولاّ
تحبى اجيب لك الضله بدون أشجار
ولو عاوزه نهار قولى
ولو عاوزه قمر لولى
ولو عاوزه السما تطولى
انا مرهون
اشارة بس من أيدك
الم الكون فى كفينك
انا عفريت
ألف الحب على خصرك
وازوق ضحكتك بشريط
هدية من تفاصيلى خلاص سميت
عليكى بالهوى صليت
انا قبل الكلام والشعر
بعيونك انا اتوضيت
زهقت سلام
تحياتى
انا نفسى ف قصيدة شعر
تتصور على خدودك
ويكتبها قلم روجك
بدون إلهام
وتبقى الباقيه ف حياتك
وتبقى الباقيه ف حياتى
وفى الأيام
...............
حمدي موسى